ከፍተኛ የመንግሥት ባለሥልጣናትን በጡረታ ማሰናበት እንደሚቀጥል ተገለጸ

በመንግሥት ከፍተኛ የኃላፊነት ቦታዎች ላይ ለረዥም ዓመታት ያገለገሉ ባለሥልጣናትን በጡረታ ማሰናበት እንደሚቀጥል የጠቅላይ ሚኒስትር ጽሕፈት ቤት አስታወቀ፡፡ የጠቅላይ ሚኒስትር ጽሕፈት ቤት ይኼንን ያስታወቀው፣ አምስት ከፍተኛ የመንግሥት ኃላፊዎች በጡረታ መሰናበታቸውን ማክሰኞ ግንቦት 7 ቀን 2010 ዓ.ም ይፋ ሲያደርግ ነው፡፡

ለበርካታ ዓመታት በመንግሥት ኃላፊነት ቦታዎች ያገለገሉ ከፍተኛ የመንግሥት የሥራ ኃላፊዎች በጡረታ እንዲያርፉ እየተደረገ ነው ያለው ጽሕፈት ቤቱ፣ አምስት ከፍተኛ ኃላፊዎች በዚህ መሠረት መሰናበታቸውን አስታውቋል፡፡

አምስቱ በጡረታ ተሰናባች ከፍተኛ የመንግሥት ኃላፊዎች የውጭ ግንኙነት ስትራቴጂካዊ ጥናት ኢንስትቲዩት ዋና ዳይሬክተር ጄኔራል አቶ ስብሃት ነጋ (አቦይ ስብሃት)፣ ካሱ ኢላላ (ዶ/ር) ከፖሊሲ ጥናትና ምርምር ማዕከል፣ አቶ በለጠ ታፈረ ከተቀናጀ የመሬት አጠቃቀም ዕቅድና ፖሊሲ ዝግጅት ፕሮጀክት፣ አቶ ታደሰ ኃይሌ ከንግድና ኢንዱስትሪ የፖሊሲ ዕቅድ አፈጻጸምና ክትትል፣ እንዲሁም አቶ መኮንን ማንያዘዋል ከፖሊሲ ጥናትና ምርምር ማዕከል ናቸው፡፡

አንጋፋው የሕወሓት መሥራችና ነባር አመራር አቶ ስብሃት ነጋ በነበሩበት ኃላፊነት ከሁለት አሥርት ዓመታት በላይ ቆይተዋል፡፡ አቶ ስብሃት በሌላ መንግሥታዊ ኃላፊነት ባይሠሩም፣ የኤፈርት የቦርድ ሊቀመንበር ነበሩ፡፡

ካሱ ኢላላ (ዶ/ር) የደኢሕዴን ሊቀመንበር፣ የቀድሞዎቹ የሥራና የከተማ ልማት ሚኒስትርና የመሠረተ ልማት ሚኒስትር፣ በምክትል ጠቅላይ ሚኒስትር ማዕረግ የኢኮኖሚ ጉዳዮች ኃላፊ ሆነው ከመሥራታቸውም በላይ፣ በፖሊሲ ጥናትና ምርምር ማዕከል አገልግለዋል፡፡ በተጨማሪም በቤልጂየም ብራሰልስ የኢትዮጵያ ባለሙሉ ሥልጣን አምባሳደር ነበሩ፡፡

አቶ በለጠ ታፈረ የትግራይ ክልል የግብርናና ተፈጥሮ ሀብት ምክትል ቢሮ ኃላፊ፣ እንዲሁም የተፈጥሮ ሀብት ልማትና የአካባቢ ጥበቃ ቢሮ ምክትል ቢሮ ኃላፊ፣ የትግራይ ክልል የጂአይዜድ የተፈጥሮ ሀብት ሲኒየር አማካሪ ነበሩ፡፡ በኋላም በፌዴራል መንግሥት የአካባቢ፣ ደንና የአየር ንብረት ለውጥ ሚኒስትር በመሆን ሠርተዋል፡፡ በጡረታ እስከተሰናበቱበት ዕለት ድረስ ከላይ በተጠቀሰው ፕሮጀክት ውስጥ ቆይተዋል፡፡

አቶ ታደሰ ኃይሌ የመጀመርያው የኢትዮጵያ ኢንቨስትመንት ባለሥልጣን ዋና ዳይሬክተር፣ እንዲሁም የንግድና ኢንዱስትሪ ሚኒስትር ዴኤታ በመሆን ለረዥም ዓመታት አገልግለዋል፡፡ በመጨረሻም በጡረታ እስኪሰናበቱ ድረስ በንግድና ኢንዱስትሪ ፖሊሲ ዕቅድ፣ አፈጻጸምና ክትትል ሠርተዋል፡፡

የፓርቲ አባል ያልሆኑት አቶ ማንያዘዋል መኮንን የቀድሞ የገንዘብና ኢኮኖሚ ልማት ሚኒስትር ዴኤታ፣ የብሔራዊ ፕላን ኮሚሽን መሥራችና የመጀመርያው ኮሚሽነር፣ እንደሁም የኢንዱስትሪ ሚኒስትር በመሆን ሠርተዋል፡፡ በመጨረሻም በፖሊሲና ምርምር ማዕከል ውስጥ ሲያገለግሉ ነበር፡፡

የጠቅላይ ሚኒስትር ጽሕፈት ቤት ባወጣው መግለጫ አገሪቱ እያካሄደች ያለችው ሪፎርም የተሳካ እንዲሆን የማድረግ፣ ለሕዝቡ የልማትና ለውጥ ፍላጎት ተገቢ ምላሽ የመስጠት ሥራ ተጠናክሮ እንዲቀጥል የሚያግዙ ዕርምጃዎች እየተወሰዱ እንደሚገኙ ገልጾ፣ ከእነዚህ ዕርምጃዎች መካከል ጠቅላይ ሚኒስትር ዓብይ አህመድ (ዶ/ር) እያካሄዱት ያለው የካቢኔ ለውጥ ይገኝበታል ብሏል፡፡

ጠቅላይ ሚኒስትሩ የተለያዩ የመንግሥት ተቋማት በአዳዲስ ኃላፊዎች እንዲመሩ በማድረግ ላይ እንደሚገኙ አስታውሶ፣ በዚህም መሠረት በቀጣይ ለረዥም ዓመታት  በመንግሥት ኃላፊነት ቦታዎች ላይ ያገለገሉ በጡረታ እንዲያርፉ የሚደረገው ሥራ ይቀጥላል ሲል አስታውቋል፡፡

Leave a Reply

Your email address will not be published. Required fields are marked *